Joshua 21

Amadolobho abaLevi

1Abakhokheli bezimuli zabaLevi balanda u-Eliyazari umphristi, uJoshuwa indodana kaNuni, labakhokheli bezinye izimuli ezizwaneni zako-Israyeli, 2eShilo eseKhenani bathi kubo, “UJehova walaya ngoMosi wathi lisinike amadolobho okuhlala, alamadlelo ezifuyo zethu.” 3Ngakho njengoba uJehova wayelayile, ama-Israyeli anika abaLevi amadolobho alandelayo lamadlelo kuvela elifeni labo:

4Inkatho yakuqala yawela amaKhohathi, usendo ngosendo. AbaLevi ababeyizizukulwane zika-Aroni umphristi babelwa amadololobho alitshumi lantathu ezizwaneni zakoJuda, ezako Simeyoni lezakoBhenjamini.

5Inengi lonke lezizukulwane zikaKhohathi babelwa amadolobho alitshumi kuzinsendo zezizwana zako-Efrayimi, ezakoDani lengxenye yakoManase.

6Izizukulwana zikaGeshoni zabelwa amadolobho alitshumi lantathu kuzinsendo zezizwana zako-Isakhari, ezaka-Asheri ezakoNafthali lesizwana esiyingxenye yesakoManase eBhashani.

7Izizukulwana zikaMerari, usendo ngosendo, zathola amadolobho alitshumi lambili ezizwaneni zakoRubheni, ezakoGadi lezako Zebhuluni.

8Ngakho abako-Israyeli babela abaLevi amadolobho la lamadlelo awo, njengokulaya kukaJehova ngoMosi.

9Ezizwaneni zakoJuda lezakoSimeyoni amadolobho abiwayo nanka ngamabizo awo

10(la amadolobho anikwa izizukulwana zika-Aroni ezazivela kuzinsendo zamaKhohathi phakathi kwabaLevi, ngoba inkatho yakuqala yawela kuzo):

11Bazinika iKhiriyathi Abha (okutsho iHebhroni) emadlelweni akulowommango elizweni elilamaqaqa lakoJuda (u-Abha wayengukhokho ka-Anabhi). 12Kodwa amasimu lemizana okwakuseduzane ledolobho babekunike uKhalebi indodana kaJefune ukuba kube ngokwakhe.

13Ngakho izizukulwana zika-Aroni umphristi bazinika iHebhroni (idolobho lokuphephela kwalabo abalamacala okubulala), iLibhina, 14iJathiri, i-Eshthemowa

15iHoloni, iDebhiri, 16i-Ayini, iJutha leBethi Shemeshi, ndawonye lamadlelo awo – amadolobho ayisificamunwe munye esuka ezizwaneni lezi zombili.

17Esizwani sakoBhenjamini bazinika iGibheyoni, iGebha, 18i-Anathothi le-Alimoni, ndawonye lamadlelo awo – amadolobho amane.

19Wonke amadolobho abaphristi, izizukulwana zika-Aroni, ayelitshumi lantathu ndawonye lamadlelo awo.

20Ezinye zonke izinsendo zesiKhohathi phakathi kwabaLevi zabelwa amadolobho esizwaneni sako-Efrayimi.

21Elizweni elilamaqaqa elako-Efrayimi zanikwa iShekemu (idolobho lokuphephela kwalabo abalamacala okubulala) leGezeri,

22iKhibhizayimi leBhethi Horoni, ndawonye lamadlelo awo – amadolobho amane.

23Esizwaneni sakoDani zathola i-Elithekhe, iGibhethoni, 24i-Ayijaloni leGathi Rimoni, ndawonye lamadlelo awo – amadolobho amane.

25Kungxenye yesizwe sakoManase zathola iThanakhi leGathi Rimoni, ndawonye lamadlelo awo – amadolobho amabili.

26Wonke la amadolobho alitshumi lamadlelo awo anikwa kuzo zonke izinsendo zamaKhohathi.

27Izinsendo zamaLevi ezeGeshoni zanikwa: kungxenye yesizwana sakoManase, iGolani eseBhashani (idolobho lokuphephela kwalabo abalamacala okubulala) leBhe Ashthara, ndawonye lamadlelo awo – amadolobho amabili;

28esizwaneni sika-Isakhari, iKhishiyoni, iDabherathi, 29iJarimuthi le-Eni Ganimi, ndawonye lamadlelo awo – amadolobho amane;

30esizwaneni sika-Asheri, iMishali, i-Abhidoni,

31iHelikhathi leRehobi, ndawonye lamadlelo awo – amadolobho amane;

32kusukela esizwaneni sakoNafthali, iKhedeshi eseGalile (idolobho lokuphephela kwalabo abalamacala okubulala), iHamothi Dori leKharithani, ndawonye lamadlelo awo – amadolobho amathathu.

33Wonke amadolobho ezinsendo zamaGeshoni ayelitshumi lantathu, ndawonye lamadlelo awo.

34Izinsendo zamaMerani (okutsho bonke abaLevi) zanikwa kanje: esizwaneni sikaZebhuluni, iJokhineyami, iKharitha,

35iDimina leNahalali ndawonye lamadlelo awo – amadolobho amane;

36esizwaneni sakoRubheni, iBhezeri, iJahazi,

37iKhedemoshi leMefahathi ndawonye lamadlelo awo – amadolobho amane;

38esizwaneni sakoGadi, iRamoshi eseGileyadi (idolobho lokuphephela kwalabo abalamacala okubulala), iMahanayimi, 39iHeshibhoni leJazeri ndawonye lamadlelo awo – amadolobho amane esewonke.

40Wonke amadolobho abelwa izinsendo zamaMerari, eyingxenye yonke eseleyo yabaLevi, ayelitshumi lambili.

41Amadolobho abaLevi elizweni eliphansi kwabako-Israyeli ayengamatshumi amane lesificamibili esewonke ndawonye lamadlelo awo.

42Linye ngalinye lamadolobho la lalilamadlelo aligombolozeleyo. Konke kwakunjalo ngawo wonke la amadolobho.

43Ngakho uJehova wanika u-Israyeli wonke umhlaba ayefunge ukuwunika okhokho bakhe bawuthatha basebesakha khonapho. 44UJehova wabapha ukuphumula kunhlangothi zonke, njengokufunga ayekwenze kubokhokho babo. Akulasitha lesisodwa esenelisa ukumelana labo; uJehova wanikela zonke izitha zabo kubo.

45Asikho lesisodwa sazo zonke izithembiso ezinhle zikaJehova endlini ka-Israyeli esehlulekayo; zonke zagcwaliseka.